Opportunidade atu halao treinamento hamutuk ho SAPO.tl

ARKTL halao hela parseria intersante ho SAPO.tl hodi kria treinamento konaba media on line ba radio komunitaria sira iha Timor-Leste.

SAPO.tl nu’udar embasador ida ne’ebe mak forte los, hodi haforte timor oan sira, liu husi oferese treinamento, hodi nune’e, timor oan bele iha abilidade atu utilija instrumentu on line, wainhira hakarak atu fahe informasaun ba malu inklui mos bele fahe rekursu no notisia ba malu.

Gina XXX husi SAPO.tl sente kontente wainhira halao parseiria ho ARKTL, tamba liu husi parseria ida ne’e, sei ajuda radio komunitaria sira atu utilija media on line, hodi nune’e sira bele fahe informasaun ba malu ho lalais no bele fo asesu ba ema barak.

Prezado Ximenes, Prezidente ARKTL hanoin katak importante tebes ba radio komunitaria atu hari’i sira nian abilidade iha parte fornese notisia liu husi media on line inklui bele hatene mos oinsá atu utilija media on line, nu’udar instrumento ida ba radio komunitaria iha Timor-Leste, wainhira hakarak atu atinji sira nian objektivu.

Prezado salenta tan katak asesu ba internet dadauk ne’e, buras los iha Timor-Leste, liu husi komputador no telemovel. Tamba ne’e, liu husi opportunidade halao treinamento ho SAPO.tl, sei ajuda radio komunitaria sira hodi bele perpara sira nian an atu bele hasoru sira nian futuru.

Por ijemplu liu husi treinamento ne’e, sei bele hakbi’it abilidade husi radio komunitaria atu utilija asesu internet hodi bele asesu ba informasaun no bele fahe informasaun mos ba ema barak neebe mak hela iha Dili, iha distritos, inklui mos ba sira ne’be mak hela iha nasaun seluk.

Dadauk ne’e, ARKTL no SAPO.tl sei oferese opportunidade ba representante husi kada estasaun radio komunidade iha Timor-Leste atu bele hola parte iha treinamento durante loron tolu hodi bele aprende konaba hakarek website, aprende konaba matadalan ba social media, rede serbisu online no selseluk tan. Treinamento ne’e, sei halao iha Dili ba dala rua, mak hanesan permeiru sei halao iha loron 16 -18 Junho no segundu sei halo iha loron 23 -25 Junho.

Imajen: Prezado Ximenes, Presidente ARKTL koalia konaba treinamento ba radio komunitaria ho Gina Araújo, SAPO.tl

Advertisements