TREINAMENTU IHA RADIO KOMUNIDADE MAUBISSE MAU-LOKO

TREINAMENTU IHA RADIO KOMUNIDADE MAUBISSE MAU-LOKO, FACILITA HUSI ARKTL – ASOSIASAUN RADIO RADIO KOMUNIDADE TIMOR-LESTE

Iha loron 19 fulan Maiu 2014 to’o loron 23 fulan Maiu 2014, ARKTL Asosiasaun Radio Komunidade Timor-Leste hamutuk ho Radio Komunidade Maubisse Mau-Loko, facilita treinamentu iha Radio Komunidade Maubisse Mau-Loko , ba estudante estajiariu sira no estudante sekundariu no mos jornalista voluntariu sira iha radio Komunidade maubisse Mau-Loko.

Treinador ne’ebe mak fo treinu ba Estudante no jornalista voluntariu sira mak Joaquim Coutinho Manajer Radio Komunidade Maubisse, Laurindo Mendonca Martins Xavier no ajuda husi Mana Lena. Iha treinamentu refere, koalia kona ba introdusaun sobre radio komunidade, funsionamentu ekipamentus studio, oinsa uza cool edit pro hodi produs noticias ka informasaun, abilidade baziku hodi halibur noticias, hakerek skrita ou naska no intervista ikus liu treinu kona ba dezenho programa no aprezentasaun.

Durante treinamentu halao, participantes sira aktivu tebes, hodi participa iha treinamentu durante loron ha’at. Entertantu iha halao treinamentu refere, Mana Lena husi Radio Komunidade 3CR ofrece mos ekipamentus foun iha Estudio Radio Komunidade mak hanesan Telefone ho modelu simples hodi bele facilita jornalista Radio Komunidade Maubisse nune’e bele halao kontaktu ho komunidade liu-liu komunidade sira ne’ebe mak iha area rurais. Antes de ofrece ekipamentus telephone Mana Lena husi Radio Komunidade 3CR Australia hanorin oinsa uja telephone hodi kontaktu fontes ne’ebe mak iha programa ka aktividade hodi hato’o iha radio Komunidade.

Hafoin treinamentu remata, Mana Lena husi Radio Komunidade 3CR Australia sente kontente tamba participantes sira participa iha treinamentu ho boavontade no sira hakarak tebes atu aprende buat ruma husi radio Komunidade Maubisse.

Nune’e mos manajer Radio Komunidade Maubisse Mau-Loko Jaoquim Coutinho hato’o katak treinamentu ida ne’e importante tebes ba estudante sira no jornalista voluntariu sira, tamba ne’e ita boot sira precisa aprende liu tan hodi bele deskobre saida mak radio komunidade no radio komunidade nia papel mak saida nune’e ema hotu bele kontribui ba radio komunidade liu husi informasaun no noticias. Entertantu jestor radio komunidade Maubisse Mau-Loko ne’e esklarese liu tan katak ho treinamentu ne’ebe mak imi hetan ona labele para deit iha ne’e, maibe buka atu aprende liu tan nune’e bele iha konhecimentu diak kona ba papel radio Komunidade iha Futuru.

Atu remata manajer radio komunidade Maubisse husu Atu ARKTL bele apoiu nafatin Radio sira iha Timor-Leste, no mos radio Komunidade Maubisse liu husi treinamentu no mos ekipamentus sira. Nia sublinha liu tan katak sebele Radio komunidade sira iha Australia liu liu Radio Komunidade 3CR bele facilita Radio Komunidade sira iha Timor-Leste liu husi ARKTL.

Radio Maubisse Mauloko

Advertisements